(ភ្នំពេញ)៖ ក្នុងកិច្ចប្រជុំកាលពីព្រឹកថ្ងៃទី២៥ ខែវិច្ឆិកានេះ គ.ជ.ប បានប្រកាសថា អ្នកបោះឆ្នោតជាង ១៥ម៉ឺននាក់ អាចនឹងត្រូវលុបឈ្មោះចេញពីបញ្ជីបោះឆ្នោត ឆ្នាំ២០២០។ មូលហេតុ ៤ យ៉ាង គឺបានទទួលមរណភាព បានផ្លាស់លំនៅឋាន ឬទីសំណាក់ចេញទៅឃុំសង្កាត់ផ្សេង បានចុះឈ្មោះលើសពីមួយកន្លែង ( ឈ្មោះស្ទួន ) និងត្រូវបានដកហូតជាបណ្តោះអាសន្ននូវសិទ្ធិបោះឆ្នោត។
ជាការកត់សម្គាល់ បញ្ជីបោះឆ្នោតដំបូង និងបញ្ជីឈ្មោះអ្នកដែលត្រូវលុបចេញពីបញ្ជីបោះឆ្នោត ឆ្នាំ២០២០ នឹងត្រូវបិទផ្សាយព្រមៗគ្នា នៅតាមបណ្តាឃុំសង្កាត់ នៅទូទាំងប្រទេស នាថ្ងៃទី២៧ ខែវិច្ឆិកា ឆ្នាំ២០២០។
តាមគ.ជ.ប ប្រជាពលរដ្ឋ ដែលមានឈ្មោះក្នុងបញ្ជីបោះឆ្នោតដំបូង មានចំនួន ៨.៨៣១.៩៨៨នាក់។ ដោយឡែក អ្នកបោះឆ្នោត ដែលនឹងត្រូវលុបឈ្មោះចេញពីបញ្ជីបោះឆ្នោត មានចំនួន ១៥៤.៧៦៨នាក់។
គ.ជ.ប បញ្ជាក់ថា ប្រជាពលរដ្ឋគ្រប់រូប ដែលបានចុះឈ្មោះបោះឆ្នោត ចាប់ពីឆ្នាំ២០១៦ ដល់ឆ្នាំ២០២០ សូមអញ្ជើញចូលរួមពិនិត្យមើលឈ្មោះ និងទិន្នន័យពាក់ព័ន្ធរបស់ខ្លួននៅលើបញ្ជីបោះឆ្នោតដំបូង និងបញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោត ឆ្នាំ២០២០ នៅតាមសាលាឃុំសង្កាត់ នៅទូទាំងប្រទេស ចាប់ពីថ្ងៃទី២៧ ខែវិច្ឆិកាតទៅ។
បញ្ជីបោះឆ្នោតដំបូង និងបញ្ជីឈ្មោះអ្នកដែលនឹងត្រូវលុបចេញពីបញ្ជីបោះឆ្នោត ឆ្នាំ២០២០ ក្រៅពីបិទផ្សាយនៅតាមសាលាឃុំសង្កាត់ បញ្ជីនេះ ក៏មានបង្ហោះនៅលើគេហទំព័ររបស់គ.ជ.ប voterlist.nec.gov.kh ឬអាចស្វែងរកតាមកម្មវិធីទូរស័ព្ទដៃ ( app ) Voterlist KH ផងដែរ៕
