(ភ្នំពេញ)៖ ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តមមុនិនាថ សីហនុ ព្រះវររាជមាតាជាតិខ្មែរ បានយាងនិវត្តន៍ពីទីក្រុងប៉កាំង នៃសាធារណរដ្ឋប្រជាមានិតចិន មកដល់ភ្នំពេញវិញហើយ នៅម៉ោងប្រមាណ ៤រសៀលថ្ងៃទី៧ ខែវិច្ឆិកា ឆ្នាំ២០២០។
ឥស្សរជនថ្នាក់ដឹកនាំកំពូលៗ បានអញ្ជើញទទួលព្រះរាជដំណើររបស់ព្រះអង្គ នៅអាកាសយានដ្ឋានអន្តរជាតិភ្នំពេញ ដែលរួមមាន៖ សម្តេចហេងសំរិន ប្រធានរដ្ឋសភា សម្តេច សាយ ឈុំ ប្រធានព្រឹទ្ធសភា សម្តេច ស ខេង រដ្ឋមន្ត្រីក្រសួងមហាផ្ទៃ ព្រមទាំងថ្នាក់ដឹកនាំ និងព្រះរាជវង្សានុវង្ស រួមទាំងសិក្សានុសិស្ស និងប្រជាពលរដ្ឋជាច្រើនទៀត។ នៅមុខព្រះបរមរាជវាំង ក៏មានប្រជាពលរដ្ឋ និងមន្ត្រីរាជការ ឈរចាំទទួលព្រះអង្គទាំងទ្វេផងដែរ។
សូមរមឹ្លកថា ព្រះករុណា ព្រះមហាក្សត្រ សម្ដេចព្រះនរោត្ដម សីហមុនី និងព្រះមាតាបានយាងទៅកាន់ទីក្រុងប៉េកាំង ប្រទេសចិន កាលពីថ្ងៃទី៦ ខែតុលា ឆ្នាំ២០២០ ដើម្បីពិនិត្យ និងព្យាបាលព្រះរាជសុខភាព។
កាលពីថ្ងៃទី៦ ខែវិច្ឆិកា ឆ្នាំ២០២០ ឯកឧត្តម XI JINPING ប្រធានាធិបតី នៃសាធារណរដ្ឋប្រជាមានិតចិន បានថ្វាយសម្ដេចព្រះមហាក្សត្រី នរោត្តម មុនិនាថ សីហនុ នូវគ្រឿងឥស្សរិយយស «មិត្តភាព នៃសាធារណរដ្ឋប្រជាមានិតចិន»។ ពិធីនេះ ត្រូវបានប្រារព្ធឡើង នៅវិមានប្រជាជនចិន ទីក្រុងប៉េកាំង សាធារណរដ្ឋប្រជាមានិតចិន៕
