(ភ្នំពេញ)៖ ក្រសួងសុខាភិបាល បានប្រកាសនៅព្រឹកព្រលឹមថ្ងៃទី១៥ ខែធ្នូនេះថា អ្នកជំងឺកូវីដ១៩ ចំនួន ៣នាក់ ពាក់ព័ន្ធទៅនឹងព្រឹត្តិការណ៍សហគមន៍ ២៨វិច្ឆិកា ត្រូវបានព្យាបាលជាសះស្បើយពីជំងឺកូវីដ១៩ ហើយត្រូវបានអនុញ្ញាតឲ្យចេញពីមន្ទីរពេទ្យ កាលពីថ្ងៃទី១៤ ខែធ្នូ ឆ្នាំ២០២០។
ក្រសួងសុខាភិបាល ក៏បានប្រកាសពីករណីជាសះស្បើយ ចំនួន ៣នាក់ ដែលជាអ្នកពាក់ព័ន្ធទៅនឹងព្រឹត្តិការណ៍សហគមន៍២៨វិច្ឆិកា នោះគឺបុរសជនជាតិខ្មែរ អាយុ ៥៧ឆ្នាំ មានអាសយដ្ឋានស្នាក់នៅបបុរីប៉េងហួត ផ្លូវ៦០ម៉ែត្រ រាជធានីភ្នំពេញ ជាអគ្គនាយកពន្ធនាគារនៃក្រសួងមហាផ្ទៃ ( លោក ឆែម សាវុធ ) ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន ៣ដង និងត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។
រីឯអ្នកជាសះស្បើយ ២នាក់ទៀត ក៏ត្រូវបានក្រសួងសុខាភិបាល ប្រកាសថា ជាស្ត្រីជនជាតិខ្មែរ អាយុ ៣០ឆ្នាំ មានអាសយដ្ឋានស្នាក់នៅសង្កាត់និរោគ ខណ្ឌច្បារអំពៅ រាជធានីភ្នំពេញ ជាសមាជិកគ្រួសាររបស់អ្នកបើកបរឲ្យឯកឧត្តមអគ្គនាយកពន្ធនាគារ និងបុរសជនជាតិខ្មែរ អាយុ ៣៤ឆ្នាំ មានអាសយដ្ឋាន ស្នាក់នៅសង្កាត់និរោគ ខណ្ឌច្បារអំពៅ រាជធានីភ្នំពេញ ធ្វើការនៅក្រសួងមហាផ្ទៃ ដែលជាអ្នកប៉ះពាល់ជាមួយឯកឧត្តមអគ្គនាយកពន្ធនាគារ។
ក្រសួងសុខាភិបាល ក៏បានកត់សម្គាល់ថា បុគ្គលអ្នកជំងឺ ២នាក់ខាងលើ ត្រូវបានព្យាបាលជាសះស្បើយ ដោយទទួលលទ្ធផលតេស្តអវិជ្ជមានវីរុសកូវីដ១៩ ចំនួន ២ដង និងត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។
ក្រសួងសុខាភិបាល ក៏បានប្រកាសពីលទ្ធផលធ្វើតេស្ត អ្នកប៉ះពាល់ក្នុងព្រឹត្តិការណ៍សហគមន៍២៨វិច្ឆិកា កាលពីថ្ងៃទី១៤ ខែធ្នូ គឺមានសំណាក សរុបចំនួន ៤០៥១សំណាក។ ក្នុងចំនួននេះ មានចំនួន ៣៥២៤សំណាក ត្រូវបានធ្វើវិភាគដោយវិទ្យាស្ថានប៉ាស្ទ័រកម្ពុជា នៅថ្ងៃទី១៤ ខែធ្នូ គឺមានលទ្ធផលវិជ្ជមានវីរុសកូវីដ១៩ថ្មី ម្នាក់ ដែលជាកុមារា អាយុ ១ឆ្នាំ មានអាសយដ្ឋាន ស្នាក់នៅសង្កាត់និរោគ ខណ្ឌច្បារអំពៅ រាជធានីភ្នំពេបញ ជាកូនប្រុសរបស់ស្ត្រីជនជាតិខ្មែរ អាយុ ៣០ឆ្នាំ ដែលវិជ្ជមានវីរុសកូវីដ១៩ នៅថ្ងៃទី២៩ ខែវិច្ឆិកា ឆ្នាំ២០២០ ហើយកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ដោយឡែក មាននៅសល់វត្ថុសំណាក ចំនួន ៥២៧សំណាក់ទៀត ដែលត្រូវធ្វើវិភាគបន្ត នៅថ្ងៃទី១៥ ខែធ្នូ ឆ្នាំ២០២០នេះ។
សរុបអ្នកជំងឺកូវីដ១៩ ដែលបានរកឃើញពាក់ព័ន្ធនឹងព្រឹត្តិការណ៍សហគមន៍២៨វិច្ឆិកា ពីថ្ងៃទី២៨ ខែវិច្ឆិកា ដល់ថ្ងៃទី១៤ ខែធ្នូ ឆ្នាំ២០២០ មានចំនួន ៤១នាក់ ( ស្ត្រី ១៩នាក់ និងបុរស ២២នាក់ )។ ក្នុងនោះ ក៏មានអ្នកជាសះស្បើយ ៣នាក់ហើយ។
ក្នុងសេចក្តីប្រកាស នៅព្រឹកថ្ងៃទី១៥ ខែធ្នូនេះ ក្រសួងសុខាភិបាល ក៏បានប្រកាសពីករណីវិជ្ជមានវីរុសកូវិដ១៩ថ្មី ចំនួន ២នាក់ទៀត ដែលជាអ្នកដំណើរចូលមកកម្ពុជា មិនមានពាក់ព័ន្ធទៅនឹងព្រឹត្តិការណ៍សហគមន៍២៨វិច្ឆិកា រួមមាន ស្ត្រីជនជាតិខ្មែរ-អាមេរិក អាយុ ៦៦ឆ្នាំ ជាអ្នកដំណើរមកពីសហរដ្ឋអាមេរិក មកដល់កម្ពុជា នៅថ្ងៃទី១៣ ខែធ្នូ ឆ្នាំ២០២០ និងស្ត្រីជនជាតិជប៉ុន អាយុ ៣៤ឆ្នាំ មកដល់កម្ពុជា នៅថ្ងៃទី១៣ ខែធ្នូ ឆ្នាំ២០២០។
ក្រសួងសុខាភិបាល ក៏បានប្រកាសថា គិតត្រឹមម៉ោង ៧ព្រឹក ថ្ងៃទី១៥ ខែធ្នូ ឆ្នាំ២០២០ នៅទូទាំងប្រទេស រកឃើញអ្នកជំងឺកូវីដ១៩ សរុបចំនួន ៣៦២នាក់ ( ស្ត្រី ៨៦នាក់ និងបុរស ២៧៦នាក់ )។ ក្នុងនោះ ៣១២នាក់ ត្រូវបានព្យាបាលជាសះស្បើយ និង ៥០នាក់ កំពុងសម្រាកព្យាបាលនៅមន្ទីរពេទ្យ ( ៣៣នាក់ សម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ ១០នាក់ សម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ និង ៧នាក់ កំពុងសម្រាកព្យាបាលនៅមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន ក្នុងរាជធានីភ្នំពេញ )៕
