(ភ្នំពេញ)៖ ខុទ្ទកាល័យសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានប្រកាសចាត់វិធានការ ស្រាវជ្រាវលើការផ្សាយព័ត៌មាន ដែលប៉ះពាល់ ឯកឧត្តម ថន វីរៈ បច្ចុប្បន្នជាទីប្រឹក្សាសម្តេចក្រឡាហោម មានឋានៈស្មើអនុរដ្ឋលេខាធិការ ដើម្បីរកយុត្តិធម៌។

សារប្រកាសចាត់វិធានការនេះ ត្រូវបានប្រកាសនៅលើទំព័រហ្វេសប៊ុក ឯកឧត្តម ខៀវ សុភ័គ ជារដ្ឋលេខាធិការ និងជានាយកខុទ្ទកាល័យ សម្តេចក្រឡាហោម ស ខេង នៅមុននេះបន្តិច ដោយមានខ្លឹមសារថា «ខុទ្ទកាល័យសម្តេចក្រឡាហោម បានឃើញ ក្នុងបណ្តាញសង្គម នៅថ្ងៃនេះ ចុះផ្សាយព័ត៌មាន ទាក់ទងនឹងឯកឧត្តម ថន វីរៈ ដែលមានតួនាទីជាទីប្រឹក្សា សម្តេចក្រឡាហោម។ ការចុះផ្សាយនោះ បាននិយាយរិះគន់ប៉ះពាល់ ដល់កិត្តយសរបស់ឯកឧត្តម ថន វីរៈ។ ខុទ្ទកាល័យ សម្តេចក្រឡាហោម បានទទួលការណែនាំឲ្យធ្វើការស្រាវជ្រាវបញ្ហានេះ ដើម្បីស្វែងរកយុត្តិធម៌ជូនភាគីទាំងសង្ខាង»។

ការប្រកាសវិធានការរបស់ ខុទ្ទកាល័យសម្តេចក្រឡាហោម បានធ្វើឡើងបន្ទាប់ពីសារព័ត៌មានអនឡាញឈ្មោះ Pheng Vannk News បានចុះផ្សាយនៅថ្ងៃទី១០ ធ្នូ ក្រោមចំណងជើងថា «ឈ្មួញរកស៊ីដី ល្បីខាងបោកប្រាស់ប្រជាពលរដ្ឋ ក្លាយជាទីប្រឹក្សា សម្តេចក្រឡាហោម ស​ ខេង មានឋានៈស្មើអនុរដ្ឋលេខាធិការ»។ អត្ថបទក៏បានសរសេរបញ្ចេញមតិជាសំណួរបន្ថែមថា «គេមិនដឹងថា ឈ្មោះ ថន វីរៈ រត់ការចូលធ្វើជាទីប្រឹក្សា សម្ដេចក្រឡាហោម ស ខេង បានដោយរបៀបណានោះទេ។ តើ ទីប្រឹក្សា របស់ថ្នាក់ដឹកនាំ ត្រូវមានប្រវត្តិបែបណាខ្លះ ចំណេះដឹងអ្វីខ្លះ ទើបអាចក្លាយជាទីប្រឹក្សាបាន?»។

ការចុះផ្សាយរួមមានការអត្ថាធិប្បាយបែបនេះ ត្រូវបានខុទ្ទការល័យចាត់ទុកថា ជាការរិះគន់ ដែលប៉ះពាល់ដល់កិត្តយសរបស់ឯកឧត្តម ថន វីរៈ ហើយជាការប្រមាថមើលស្រាលចំពោះការសម្រេចចិត្តរបស់ថ្នាក់ដឹកនាំ៕