(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅថ្ងៃទី៦ ខែធ្នូនេះ បានផ្ញើសារពិសេសជំរុញអាជ្ញាឲ្យត្រួតពិនិត្យការពង្រឹងអនាម័យនៅតាមហាងលក់ទំនិញនានាឲ្យហ្មត់ចត ដើម្បីការពារការឆ្លងកូវីដ១៩។
វិធានការដែលសម្តេចតេជោនាយករដ្ឋមន្ត្រី លើកឡើងនោះមានដូចជា រក្សាគម្លាតសុវត្ថិភាព និងពាក់ម៉ាស់ជាដើម។ សម្តេចតេជោបន្តថា មិនមែនតែបុគ្គលិកតាមហាងនោះទេ សូម្បីតែភ្ញៀវ ក៏ត្រូវពាក់ពាក់ម៉ាស់ដែរ។
សម្តេចតេជោ ហ៊ុន សែន បានថ្លែងថា៖ «ប្រសិនបើទីកន្លែងនោះមិនព្រមអនុវត្តន៍ទេ សូមប្រើអំណាចរបស់រដ្ឋ អភិបាលខេត្ត រាជធានី ដើម្បីបិទហាងនោះជាបណ្តោះអាសន្នសិន ព្រោះយើងគ្មានជម្រើសណាផ្សេងឲ្យល្អជាងជម្រើសធានាក្នុងការគម្លាតសង្គម គម្លាតបុគ្គល ការពាក់ម៉ាស់ ការធ្វើអនាម័យ ទាំងអ្នកចូលទៅទិញ ទាំងអ្នកលក់ ដែលយើងសង្កេតនៅតាមហាងមួយចំនួន គឺពុំបានបំពេញគ្រប់គ្រាន់តាមលក្ខខណ្ឌតម្រូវរបស់ក្រសួងសុខាភិបាលនោះទេ»។
សម្តេចតេជោ ហ៊ុន សែន បានកត់សម្គាល់ឃើញថា ការចម្លងនៅក្នុងហាងសម្លៀកបំពាក់មួយក្នុងរាជធានីភ្នំពេញ គឺបណ្តាលមកពីការអនុវត្តន៍មិនបានត្រឹមត្រូវទៅតាមវិធានណែនាំរបស់ក្រសួងសុខាភិបាល៕
