(ភ្នំពេញ)៖ ផ្សារ​ទំនើប​អ៊ីអន១ នឹង​បើកដំណើរការ​ជាធម្មតាវិញ ចាប់ពីថ្ងៃទី២ ធ្នូ ២០២០នេះតទៅ វេលាម៉ោង ៣រសៀល ចំណែក​ផ្សារលក់ទំនិញទូទៅ​នឹងបើកដំណើរការនៅម៉ោង ១១ព្រឹក។ នេះបើតាមការបង្ហោះនៅលើទំព័រហ្វេសប៊ុក AEON MALL Phnom Penh។

ទំព័រហ្វេសប៊ុកបន្តថា ភ្នំពេញផ្សារទំនើប អ៊ីអន ម៉ល ភ្នំពេញ នៅតែបន្តការអនុវត្តន៍គោលការណ៍ការពារជំងឺកូវីដ១៩ យ៉ាងប្រុងប្រយ័ត្ន និង យកចិត្តទុកដាក់ គិតពីសុវត្ថិភាពរបស់អតិថិជន និងបុគ្គលិកជាចំបង។ 

ដើម្បីការពារខ្លួនអ្នក និងអ្នកដទៃនៅជុំវិញ ផ្សារទំនើបនេះ ក៏បាន​ណែនាំឲ្យអនុវត្តវិធីបង្ការមួយចំនួនដូចតទៅ៖ សូមពិនិត្យសីតុណ្ហភាពមុនពេលចូលផ្សារទំនើប អ៊ីអន ម៉ល (មិនអនុញ្ញាតិអោយចូលបើកំដៅចាប់ពី 37.5 អង្សារសេ), សូមមេត្តាពាក់ម៉ាស (មិនអនុញ្ញាតិអោយចូលក្នុងផ្សារបើមិនពាក់ម៉ាស), សូមលាងដៃជាមួយសាប៊ូ ឬ អាល់កុលអោយបានញឹកញាប់, សូមរក្សាគម្លាតសុវត្ថិភាពយ៉ាងតិច ១.៥ម៉ែត្រពីគ្នា, សូមចូលរួមទាំងអស់គ្នាដើម្បីទប់ស្កាត់ ការរីករាលដាលជំងឺកូវីដ១៩

សូមជំរាបជូនផងដែរថា ផ្សារទំនើប អ៊ីអន ម៉ល សែនសុខ ស៊ីធី គឺបើកដំណើរការធម្មតា៕