(ភ្នំពេញ)៖ នៅយប់ថ្ងៃទី១៩ ខែវិច្ឆិកា ឆ្នាំ២០២០ លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានឆ្លើយតបនឹងសំណួរអ្នកកាសែត ពាក់ព័ន្ធនឹងគ្លីនិករបស់លោកស្រី លី ស្រីវីណា នៅទួលទំពូង ក្នុងរាជធានីភ្នំពេញ ត្រូវក្រសួងសុខាភិបាល សម្រេចបិទ កាលពីថ្ងៃទី២៩ ខែតុលា ឆ្នាំ២០២០ ពេលនេះ ត្រូវបានប្រកាសថា នឹងចាប់បើកទ្វារ ទទួលពិនិត្យព្យាបាលអ្នកជំងឺឡើងវិញ នៅថ្ងៃទី២០ ខែវិច្ឆិកា ឆ្នាំ២០២០។
លោកជំទាវ ឱ វណ្ណឌីន បានឆ្លើយតបថា ក្រសួងសុខាភិបាល ពិតជាបានអនុញ្ញាតច្បាប់ ឲ្យគ្លីនិករបស់លោកស្រី លី ស្រីវីណា បើកទ្វារឡើងវិញមែន។ មូលហេតុ ដោយសារបានគោរពតាមការកំណត់បម្រើតែសេវាបឋម និងមានកិច្ចសន្យាត្រឹមត្រូវ គោរពតាមការណែនាំរបស់ក្រសួងសុខាភិបាល ព្រមទាំងអាជ្ញាធរមូលដ្ឋាន ដែលមានមន្ទីរសុខាភិបាលរាជធានីភ្នំពេញ ក៏បានត្រួតពិនិត្យ និងឯកភាពដែរ។
សូមរម្លឹកថា ក្រោយមានអ្នកជំងឺ ជាមេធាវីម្នាក់ បានស្លាប់នៅក្នុងគ្លីនិករបស់លោកស្រី លី ស្រីវីណា កាលពីថ្ងៃទី ខែតុលា ឆ្នាំ២០២០ រួចមក គឺនៅថ្ងៃទី២៩ ខែតុលា ឆ្នាំ២០២០ ក្រសួងសុខាភិបាល បានចេញលិខិត សម្រេចបិទគ្លីនិក លី ស្រីវីណា ដោយមូលហេតុថា ពុំមានលក្ខណៈសម្បត្តិគ្រប់គ្រាន់ ក្នុងការផ្តល់សេវាសង្គ្រោះអ្នកជំងឺ។
ក៏ប៉ុន្តែក្រោយការសម្រេចបិទដំណើរការគ្លីនិកនោះ លោកស្រី លី ស្រីវីណា ដែលបានលាឈប់ពីអតីតគណបក្សប្រឆាំង នៅមុនតុលាការកំពូល សម្រេចរំលាយអតីតគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧ បានសរសេរលិខិតផ្ទាល់ដៃ កាលពីថ្ងៃទី៩ ខែវិច្ឆិកា ឆ្នាំ២០២០ គឺស្នើសុំសិទ្ធិនយោបាយឡើងវិញ និងសុំចូលរួមជីវភាពនយោបាយជាមួយគណបក្សប្រជាជនកម្ពុជា។
ភ្លាមៗ សម្តេចតេជោ ហ៊ុន សែន ក៏បានសម្រេចទូលថ្វាយព្រះមហាក្សត្រ ចេញព្រះរាជក្រឹត្យ ប្រោសព្រះរាជទានសិទ្ធិនយោបាយដល់លោកស្រី លី ស្រីវីណា ព្រមទាំងសម្រេចយល់ព្រមឲ្យលោកស្រី លី ស្រីវីណា ចូលជាសមាជិកគណបក្សប្រជាជនកម្ពុជា នៅរាជធានីភ្នំពេញ៕
